Mar 03

Al-Khafji Beach Hotel

Al-Khafji Beach Hotel

فندق شاطئ الخفجي، قعدنا فيه بإجازه التحرير والإستقلال، طبعاً المكان جداً بسيط وشعبي بس حبيته لأن ما فيه زحمه ومجابل البحر وهم مو وايد بعيد أعتقد الطريج ياخذ ٣ ساعات أو أقل.

أول ما وصلنا كان الجو موو شي، مطر على طين والبحر صوته كان يخرع!
بس لما صار الصبح تعدل الجو وصار إينن.

الفندق دور واحد وكل الغرف مواجهه البحر،الغرف نظيفه بس وايد بسيطه.

هالصوره من بلكونه مطعم الفندق.

إحنا بصراحه عملنا حسابنا إن جنا كاشتيين و خذينا كل الأغراض اللي نحتاجها بالكشته عشان ما يقصرنا أي شي، حتى الدوّه يبناها معانا 🙂

و أشوا إن يبناها حق الجاي والتشوّي بالجو البارد ومع يمعه الأهل.

تمشينا من الصبح ولقطنا قواقع وتريقنا في مطعم الفندق مجابلين البحر 😉

أما الغدا طلبناه بالغرفه عشان نقعد بالبلكونه أشرح لنا و يم دوّتناً بعد.

أعتقد إن المكان بالشتا أحلى من الصيف، ضروري يكون الجو حلو حق التمشي.

 

Related Posts Plugin for WordPress, Blogger...
comment?